طريقة تحضير الوصفة بالتفاصيل.. خطوات عمل بسكويت الشاي في المنزل

لو حابة تفرحي أولادك بحاجه لذيذة وسهلة للفطار جربي تعملي بسكويت الشاي في البيت بطريقه بسيطة ومكونات متوفرة في كل مطبخ هو واحد من أحلى المخبوزات اللي ممكن تتاكل في أي وقت وكمان اقتصادي وسهل ومش محتاج مكونات كتير عشان كده يعتبر خيار مثالي لكل أم تحب توفر وتقدم لأهل بيتها حاجه مضمونة وطازجة غير اللي بنشتريها من المحلات البسكويت ده كمان هش وطعمه مختلف ومميز يخليه محبوب من الكبار والصغار.

المكونات المطلوبة لتحضير البسكويت

عشان تعملي بسكويت شاي لذيذ في البيت زي الجاهز استخدمي المكونات التالية:

• 2 كوب وربع دقيق أبيض.
• نصف كوب ماء.
• نصف كوب زيت.
• ملعقة كبيرة نشا.
• ملعقة كبيرة لبن بودرة.
• ربع ملعقة صغيرة ملح.
• ملعقة صغيرة بيكنج بودر.
• سكر حسب الرغبة.
• فانيليا أو بشر برتقال لإضافة نكهة مميزة.

  

طريقة تحضير بسكويت الشاي

ابدئي بخلط السكر والزيت والماء في الخلاط لحد ما لون الخليط يفتح وتابعي الخطوات التالية:

• انقلي الخليط لوعاء كبير وفي وعاء تاني نخل الدقيق كويس وبعدين اضيفيه بالتدريج مع الملح والبيكنج بودر وقلبي كويس.
• ضيفي النشا ولبن البودرة مع التحريك المستمر لحد ما تتكون عجينة متماسكة.
• لو حسيت إن العجينة محتاجة تماسك اكتر زودي شوية دقيق وغطّي العجينة وسيبيها ترتاح حوالي ربع ساعة.
• جهزي سطح نظيف وافردي عليه ورقة زبدة ورشي دقيق وافردي العجينة بالنشابة لحد ما تبقى رفيعة.
• قطعيها لمربعات متساوية واستخدمي خلة أسنان لعمل فتحات صغيرة في الوجه عشان الشكل يكون تقليدي.
• رصي القطع في صينية مدهونة بالزيت ودخليها فرن سخن على حرارة ١٨٠ درجة
• سيبيها لحد ما تستوي ويتحول لونها للذهبي وبعد كده طلعيها وسيبيها تبرد تماماً قبل التقديم وبالهنا والشفاء.